Бээжингийн олимпийн зохион байгуулах хороо энэ удаагийн паралимпиадын хамгийн гол зорилгыг сэтгэл дүүрэн биелүүлсэн гэхэд болно. Учир нь энэ удаагийн наадмыг шууд нэвтрүүлгээр нийт 75 улсад цацаж, 29 компани эфирийн цагийг худалдан авч 3000 орчим сэтгүүлч, сурвалжлагч ажилласан болохоор ямартаа ч түмэн олны мэлмийд тодорхой хэмжээгээр хүрч чаджээ гэсэн үг юм.
Дөрвөн жилд нэг удаа зохиогддог паралимпиад 13 дахь наадмаа үдэж байгаа нь энэ бөгөөд урдах наадмуудынх нь тухай өнгөц ойлголтоос илүү мэдлэгтэй хүн олон байсан гэдэг нь юу л бол. Энэ удаагийн наадамд нутгийн эзэн Хятадын тамирчид нийт медалийн багцаараа тасархай тэргүүлжээ. Жирийн тамирчдынхаа амжилтыг "жирийн бус" тамирчид нь давуулан биелүүлж 200 гаруй багц медаль хүртсэн юм. Хөгжлийн бэрхшээлтэй хүмүүс нь тийм олон юм уу, эсвэл тийм их авьяастай юм уу гэж бодмоор. Багийн дүнгээр хоёрдугаар байрт орсон Их Британийн баг бараг нэг дахин бага буюу 102 медаль хүртсэн нь урд хөршийн "тусгай" тамирчдын чадал чансааг илэрхийлж байна. Энэ удаагийн паралимпиадад манай Монголын тамирчид анхны медалиа хүртэж, хүртэх хүртэхдээ шууд алтан медалийн тавцанд буун төрийн дууллаа эгшиглүүлсэн сайхан дурсамжийг бидэнд үлдээлээ. Байт сурын Я.Баатаржавын алтан медалийн ачаар Монголын баг түүхэнд байгаагүй том үсрэлт хийж 52 дугаар байрт бичигдсэн билээ.
Мэдээллийн эх сурвалж:
No comments:
Post a Comment